Douai min grind villache

En 1968, Robert Boyaval  fait paraître son recueil « Dans la Cité de Gayant » à la gloire de sa ville natale. A travers le poème ci-dessous, il évoque la vie quotidienne des « Vint’s d’osiers », qui désignent  les habitants de la commune. « Vint’s  d’Osier » en rapport avec les ventres d’osier des géants douaisiens : Gayant et sa famille.

 DOUAI, MIN GRIND VILLACHE

A tous les Douaisiens, mes chers concitoyens

J’n’ai jamais eu quère ém’vanter,

Dir’ des bricol’s, d’z’invintionn’ries ;

Mais j’aim’ bin souvint raconter,

Tout’s les biautés dé m’chèr’ patrie.

Douai, ch’est m’in « villach » natal,

Ch’est là qu’j’ai passé tout m’jeunesse ;

Aussi, d’in parler ch’t’un régal,

D’y pinser, ch’est eun’ douch’ caresse…

Dins cheull’ grand’ cité d’ouverriers,

Plachée au mitan des usines

Et des puits du Pays minier,

Ch’est l’vi’ laborieus’ qui domine.

Douai a aussi ses biaux coins

Et ses monumints historiques ;

L’beffro, du moderne i n’d’a point,

Mais comme ouvrache, ch’est magnifique !

Faut vir l’gardin public, l’été,

Aveuc es’ grotte et pis ses plousses ;

I’est rimpli d’fleurs d’tous les côtées,

Chà s’déminder commint qu’chà pousse !

La Scarp’, comme un long ruban vert,

Coul’ douch’mint in travers él’ville

Et tout l’long dé s’pass’relle éd’fer,

L’z’amoureux pass’nt éd’z’heur’s trinquilles.

S’faufilant aveuc ches autos,

Les bons viux tramways font l’navette,

Traînant toudis un populo

Ed’gins qui vienn’nt faire des implettes.

Tous les sam’dis, ch’est l’grand branl’-bas

D’sus l’marqués dé l’ru’ d’Valenciennes,

A vir les gins par chi, par là,

In crorot eun’ ru’ parisienne !

D’l’aut’ côté, d’sus l’Plach’ Saint Amé,

Les maraîchers d’pusieurs villaches,

Vienn’nt vind’ jusqu’à midi sonné,

Leus biaux légum’s, fruits d’leus ouvraches.

L’diminche à Douai, faut vir chà,

I’a d’l’amus’mint dins toute él’ville !

Les jonn’s s’in vont au cinéma,

Pindant qu’les viux font eun’ manille.

Su l’plach’ Saint-Waast aussi des fos,

Les billonneux font eun’ partie,

Tindis qu’ailleurs, dins quéqu’ bistrots,

In bat les coqs et in parie.

Et chà, ch’est Douai tout intier,

L’ grand villach’ qu’j’ai toudis eu quère ;

Et j’sus fier d’ête un « vint’ d’osier »,

Autant qué l’l’étot min grand-père !

                                                                                  Robert Boyaval