MIN CORON

MIN CORON

Qu’chà soit à D’nain (1) o bin ailleurs,

Les corons sont toudis les mêmes ;

El’ pays noir est pou l’mineur,

Un coin qui qui’rot aveuc peine.

D’abord pou y viv’, faut y’ êt’ né,

Y’avoir passé comm’ mi s’jeunesse ;

Y avoir connu d’z’heur’s éd’gaité

Et parfos des momints d’tristesse.

L’matin j’s’qy’au soir ch’est animé

Et bin pus incor qu’au villache,

Ch’est gai , in n’peut l’imaginer,

Y’a toudis du mond’ qui voyache.

Les feimm’s n’font qu’passer, rapasser

Pou aller queurt d’l’iau à l’fontaine ;

Et l’sam’di, ch’t’ un vrai défilé ;

Ch’t’ocor pir’ qu’les aut’s jours dé s’maine.

Bin souvint, comm’ partout ailleurs,

D’vant les port’s in vot des comères,

Leu lanqu’, si ch’n’est point un malheur,

En’ font qu’tapoter d’z’heur’s intières…

Insanne all’s s’racont’nt leus tourmints,

Ch’qu’i’ ont aquaté à l’épicerie ;

Pindant qu’les goss’s, comm’ des grand’s gins,

S’amus’nt aux cart’s d’vant l’buand’rie.

Mais ches discours sont vit’ finis

Quand les homm’s arvienn’nt éd’l’ouvrache ;

Aussitôt él dîner i’ est servi,

In n’s’occup’ pus du babillache !

Quand l’mineur est r’v’nu du traval,

Tout sin temps, i l’passe à s’distraire,

Ch’est pou dir’ qu’i obli’ sin mal

Et i vaut miux chà qu’à l’vir braire !

Aussitôt qu’i’ a fini d’minger

Et comm’ pou faire él’digestion ;

Batissse, un artiste ouverrier,

Jue eun’ tiote air d’accordéon.

Ch’ti qui reste à l’dernièr’ maison,

Ch’t’un polonais, li, d’z’heur’s durantes,

I fait aveuc sin violon

Des gamm’s montant’s et déquindantes !

Des fos, pis même incor souvint,

Dins l’musique éclate eun’ dispute ;

Pou eun’ tiot’ bricol’, deux fos rin,

El’ gaîté dins l’ménach’ culbute…

Et tous les jours és’pass’nt ainsi,

Jamais y’a un momint d’silince,

Et tous ches gins, ches bruits, ches cris,

Ils font parti’ dé m’n’existence…

(1) Denain (Nord)

extrait de "Au pays des gueules noires"