Hommage à nos braves mineurs (Recueil : "Au pays des gueules noires")

HOMMAGE A NOS BRAVES MINEURS

In n’a jamais vanté assez
El’ dur traval ed’ tous ches braves
Ch’qu’in a pu fair’, ch’est les blâmer
Et leu porter tout’ sort’ d’intraves.

Pourtant ch’est l’métier l’pus ingrat,
Faut déquinte au fond pou l’comprinte
Là, l’traval ch’est eun’ vi’ d’ forçat,
Et pou l’mineur n’faut point l’dépeinte.

L’fond dé l’foss’, ch’est toute eun’ cité
Duch’ qu’y-a fallu dé l’sueur d’homme
Pou arriver à tout boiser,
Et ch’n’est point rin à faire, in somme !

Quand l’cagein haut du treuil attind,
Ch’n’est point l’momint d’conter d’histoires ;
In queurt aveu s’lamp’ dins les mains,
Pou r’trouver in bas les vout’s noires.

Dins l’tall’, chà n’fait qu’aller et v’nir,
In a point l’temps d’artourner s’tiête ;
I faut ouvrer comm’ des matyrs,
Rivés à l’tâch’ comm’ des vrais biêtes…

Dins les vein’s, les marteaux piqueurs
Font intind’ l’canchon infernale ;
Eclairé d’lamp’s aux pal’s lueurs,
L’carbon creusé parfond dévale.

Si l’veine est tiot’ comme un boïau
L’mineur dot allonger sin vinte ;
Ramper d’ses queud’s, s’poser d’su l’dos,
S’n’ouvrache est là, il faut qu’il rinte.

Parfos aveuc sin corps in sang,
Ses bras rimplis d’sueur et d’griffes,
L’brav’ homm’ s’arliève in berloquant,
Incor plein d’corach’ qui l’avife.

Ch’n’est qu’va et vient dins les quartiers,
L’carbon est m’né à l’accrochache
Dins les berlin’s, pis sans arrêt,
I r’mont dins l’cag’ vers l’criblache.

Souvint, ch’est à l’heur’ du briquet
Qu’in s’arpose un cop aveu l’z’autes ;
Et là, l’temps passe à discuter,
In mingeant s’neuch’ rimpli’ d’compote.

Et ch’est ainsi qué s’passe au fond
Dé l’grand’ cité aux leumières pâles,
Dins l’sueur et l’poussiièr’ d’carbon,
Toute él’ vi’ d’un peupl’ qui travalle.

In peut vanter leu’s rud’s efforts
Leus heur’s pénibl’s, leur rude ouvrache
Et respecter bin pus’ incor,
Leu corps meurtri su tout’s les plaches…