L’FETE ED’GAYANT A DOUAI

L’FETE ED’GAYANT A DOUAI

Amicalement à mon confrère Constant COPIN, le barde douaisien.

Ran tan plan, ran tan plan !

Un bruit d’tambour et d’trompette

Résonn’ dins l’cité coquette,

Annonçant l’sorti’ d’Gayant.

L’matin, les cloqu’s ont sonné,

Réveillant d’leus harmonies,

Les gins incor indormies,

J’s’qu’au quartier l’pus éloigné.

Tout l’monde a mis sin drapeau

Et garni d’fleurs és’ferniète ;

Les magasins pou l’grand’ fête,

Ont tous baissé leu rideau.

D’sus l’plac’ d’Arm’s, comm’ tous les ans

Est exposé’ l’grand’famille ;

Un peuple ed’badauds fourmille

Pou admirer les géants.

Pindant qu’s’fait l’rassemblemint

Des sociétés d’musique,

Des infants font l’gymnastique,

Pou imbrasser l’tiot Binbin.

Pis l’mond’ c’minche à défiler,

Gayant et s’feimm’ sont in tête ;

Suivis d’cavaliers d’carettes,

D’cent musiciens et d’pompiers.

Insuit’ ch’est l’dislocation,

Mais l’fêt n’est point terminée,

All’ dur’ bin pus qu’eun’ journée,

Il n’a pus qu’dé l’distraction.

Ed’sus l’grand plac’ du Barlet,

L’z’infants et les grand’s personnes,

Mingeant frit’s et tart’s à prônes,

D’sus les manèch’s n’font qu’monter.

Plac’ Carnot, l’après-midi,

Pou l’z’amateurs éd’musique,

Eun’ pai’ d’concerts magnifiques

Sont toudis fort applaudis.

Tous les cabarets sont pleins,

In tonniau, in boutell’, l’bière

Coule à grands flots dins les verres

A l’grand’ joi’ des Douaisiens…

L’soi dé ch’grand jour, l’viux beffro,

Illuminé d’mill’ lumières,

Arwétte aveu s’n’allur’ fière

L’fu d’artifice au-d’ssus d’l’iau.

Toute él’nuit, jonn’s et viell’s gins

S’mélang’nt tertous dins la danse

Et Monsieur l’Mair’, dins l’assistance,

N’fait qu’rir tell’mint qu’i est contint !

Tiré du recueil "Dans la cité de Gayant"