L’PATOIS NOT’LANGACHE

En hommage à M. Louis HUARD-WATTEEUW,

                                            Président de la « Muse de Watteeuw »

Nous aut’s, les habitants du Nord,

In aim gramint él’bavardache ;

Si in dit qué l’silence est d’or,

Dins not’coin, il n’y treuv’ point plache !

Not’ patois, partout in l’connot,

In l’prononce éd’ville in villache;

Dé l’l’intind, jamais in s’lass’rot,

Ch’est un célébe et biau langache.

I’est fait gramint d’viux mots français,

P’t’êt’ déformés, ch’est bien possibe,

Mais pou l’ignorant, il paraît

Tout à fait incompréhensibe.

Ch’est l’vrai parlé du temps passé,

Il vient tout drot éd’nos ancêtes

Et malgré qu’ils sont trépassés,

Par éch’ langach’, leu souv’nir reste.

Pour nous, il n’est point compliqué,

Journell’mint in l’parle et in l’cante ;

In l’imploi’ mêm’ pou s’expliquer,

Aveuc ges gins intelligentes.

In sait l’parler à not’façon

Et in a point b’soin dé l’apprinde ;

Il n’faut pas nous faire éd’leçon,

Quand tout gosse, in c’minche à l’intinde.

Chett’ langu’, si prope à not’ terroir,

Compt’ parmi s’biauté tout intière

Et ch’n’est point drôl’ d’s’apercevoir

Qu’alle a pu franchir nos frontières.

In peut s’trouver à l’étranger,

Dins des régions même éloignées ;

Dès qu’in comminche à patoiser,

Not’vi’ s’treuv’ moins dépaysée.

Ch’n’est point cert’s, un langach’ grossier,

Comm’ certain’s gins sembl’nt él’ prétinde ;

Vaut miux l’parler, n’faut pas l’nier,

Qué l’vrai français, sans l’él’comprinde !

Et des fos, ch’est bin malheureux,

Quand in patois’ d’vir qu’in nous r’wette ;

In nous fait air dédaigneux,

Dins l’espoir d’brader not’ causette.

Mais il n’s’ra point abindonné,

Auceune aut’ langue én’prindra s’plache ;

In aim’rot miux én’pus parler,

Qu’perd’ not’ patois, not’ cher langache !