MIN VIUX QUARTIER

Placé aux confins du centre éd’la ville,

Bin loin d’tous les bruits et du va-et-vient,

S’étind min quartier, un tiot coin trinquille,

Aveuc ses maisons aux murs fort anciens,

Ch’est làqué j’sus né, qu’j’ai passé m’jeunesse,

Sous l’ciel gris et noir du pays minier ;

Ch’est là qu’j’ai arçu él’premièr’ tendresse,

Dins ch’tiotcoin paisib’, dins min vieux quartier.

Bintôt j’ai grandi, l’z’annés sont passées,

Berchant m’n’insoucianc’ comme él’souffl’ du vint,

M’z’amours pou les jeux és’ sont éffacées,

Mettant ainsi fin à m’n’âge infantin.

J’ai alors connu m’première amourette,

L’premier rindez-vous au bout d’un sentier

Et l’premier baiser qu’in s’donne in cachette,

J’ai connu ch’bonheur dins min vieux quartier.

Lorsqué j’sus parti pour fair’ min service,

Pour accomplir min d’voir sous les drapeaux ;

Ch’est aveuc du r’gretqu’j’ai quitté m’n’église

Pour aller r’trouver des pays nouveaux.

J’avos l’cœur serré et aux yux des larmes,

Presque éj’maudissos min nouviau métier ;

J’auros t’t’êt’ rindu m’tenue et mes armes,

Rin qu’pour artrouver l’vi’ d’min viux quartier.

Comme él’jonne osiau qui rêv’d’avinture,

Un jour l’idé’ m’vint, j’ai cru m’éloigner,

Mais si l’plaisir pass’, l’innui reste et dure,

L’nid abindonné, j’ai dû l’argagner.

J’ai compris alors qu’ch’étot point la peine

D’cacher sin bonheur par él’mone intier ;

Et l’vrai coin rêvé, j’l’ai appris sans peine,

Ch’étot m’tiot patri’, min bon vieux quartier.

Quand a té passé l’heur ‘ des fiançalles

Aveuc él’jonn’ fill’ qu’j’avos pu choisir ;

I’a fallu pinser à nos épousalles

Et peu d’temps après, in a dû s’unir.

J’avos rincontré dins tous mes voyaches,

Des feimm’s, des biautés sans pu les r’wéttier

Et pis, tout d’un cop, sans mêm’ bouger d’plache,

J’ai trouvé m’n’épous’ dins min vieux quartier.

Et comm’ chacun d’nous approch’ dé l’vieillesse,

Un jour, à min tour, éj’devrai partir ;

Comme un viux batiau qui s’treuve in détresse,

J’quitt’rai l’surfac’ pou lint’mint m’ingloutir.

J’quitt’rai m’vieill’ maison pou m’rinde au cim’tiere,

Pour él’dernier’ fos, j’gravirai l’sentier ;

L’quémin qui m’mén’ra pou min r’pos sous tierre,

Dins l’grand terrain clos éd’min vieux quartier…